9 студзеня 2020 года, у перыяд Калядных святак, на базе ДУА “Гродзенскі абласны інстытут развіцця адукацыі” адбыліся Калядныя сямейныя чытанні для прыёмных дзяцей Гродзенскай вобласці.

Мерапрыемства прайшло ў межах сацыяльна-творчага праекта “Сямейныя чытанні”, рэалізуемага ГА “Беларускі саюз жанчын” сумесна з беларускімі выдавецтвамі пры падтрымцы Міністэрства адукацыі Рэспублікі Беларусь і Міністэрства інфармацыі Рэспублікі Беларусь.

У шырокай праграме чытанняў была прадугледжана і сямейная сустрэча “Размова каля Каляднай свячы”. На сустрэчу з прыёмнымі дзецьмі і іх бацькамі прыйшлі клірык Свята-Пакроўскага кафедральнага сабора г. Гродна протаіерэй Уладзімір Барысевіч, загадчык сектара прыходскіх бібліятэк аддзела рэлігійнай адукацыі і катэхізацыі Гродзенскай епархіі і Глеб Уладзіміравіч Мурэня, царкоўнаслужыцель і дырэктар прыходскай бібліятэкі Свята-Пакроўскага кафедральнага сабора.

Пяць шматдзетных прыёмных сем’яў хутка запоўнілі клас і 30 цікаўных вачэй глядзелі на арганізатараў.

Для пачатку зносінаў дарослыя і дзеці актыўна ўключаліся ў гульнёвую праграму. А паколькі ў ёй разам з усімі ўдзельнічаў бацюшка, спрыяльная атмасфера і пазітыўны і даверны настрой быў створаны вельмі хутка.

Калядная віктарына, арганізаваная айцом Уладзімірам “Ля каляднай свячы”, прайшла пры высокай актыўнасці ўдзельнікаў. На большасць пытанняў паступілі правільныя адказы, за якія і бацькі, і іх дзеці рознага ўзросту – ад малодшых школьнікаў да старшакласнікаў, атрымалі рознакаляровыя жэтоны ў выглядзе каляднай зоркі.

А каб папоўніць веды, якіх бракуе, Глеб Уладзіміравіч па заканчэнні віктарыны прапанаваў пачытаць сямейнымі вечарамі кнігі, што маюцца ў прыходскай бібліятэцы. Дарэчы кажучы, яшчэ да яго выступлення, у часе сустрэчы дзеці свабодна і зацікаўлена падыходзілі да стала, дзе размешчана імправізаваная выстава, і бралі некаторыя кнігі, якія прывабілі падлеткаў. Удзельнікі атрымалі візіткі бібліятэкі, і спадзяемся, што ў скорым будучым там з’явяцца новыя чытачы.

З цікавасцю і вялікім жаданнем дзеці каляровымі маркерамі на атрыманых за правільныя адказы “зорачках” напісалі калядныя пажаданні. Некаторыя радасна падарылі іх адзін аднаму. Астатнія ж, са словамі “Хрыстос нарадзіўся! – Бог ваплаціўся!”, размясцілі свае пажаданні людзям “шчасця”, “міру”, “здароўя”, “любові”, “Божага благаславення” ды іншае на адметнай каляднай елачцы.

Сюрпрызам для ўсіх стала жаданне групы прыёмных дзяцей праспяваць у каляднай свячы “Дзіцячыя калядкі”. І так натуральна было атрымаць ад бацюшкі ў падарунак маленькія іконкі. А кожнай прыёмнай сям’і айцец Уладзімір падарыў ікону мучаніка немаўля Гаўрыіла, апекуна дзяцей і юнацтва, часцінка мошчаў якога знаходзіцца ў Свята-Пакроўскім саборы, а таксама салодкія прызы.

Душэўныя зносіны на сямейнай сустрэчы завяршыліся агульным фотаздымкам на памяць.

Галоўная мэта “Калядных сямейных чытанняў”, арганізатарамі якіх выступілі Гродзенскі абласны інстытут развіцця адукацыі і Гродзенскай абласная арганізацыя ГА “Беларускі саюз жанчын”, – павышэнне ролі чытання кнігі, у тым ліку і праваслаўнай, у выхаванні дзяцей і падлеткаў у прыёмных сем’яў – была дасягнута. І ў гэта грунтоўны ўклад унесены нашымі сацыяльнымі партнёрамі – прадстаўнікамі Гродзенскай епархіі.

Выражаем удзячнасць настаяцелю кафедральнага сабора протаіерэю Георгію Рою, протаіерэю Уладзіміру Барысевічу, Мурэню Глебу Уладзіміравічу за плённае супрацоўніцтва.

Кіўлюк Людміла Анатольеўна, намеснік начальніка цэнтра ідэалагічнай, выхаваўчай і сацыяльнай работы інстытута ДУА “Гродзенскі АІРА”